Morlansko bidegorria Aieterekin lotzeko igogailua egiteko aukera aipatu zuten proiektua aurkeztu zutenean. Azken aldian, aldiz, erakundeek egitasmoaz hitz egin dutenean igogailua ez dute ahotan izan. Auzo elkarteak igogailua behar-beharrezkoa dela dio. «Auzotarrak bizikletaz Amarara edo Ibaetara joatera animatuko lirateke eta beren autoak etxean utziko lituzkete. Ez lukete Munto edo Melodi inguruan igogailua jartzeko egitasmoa baztertu beharko». Bestalde, San Rokeko eskailera mekanikoak Cumbreraino iristea aietearrek begi onez ikusiko luketela erantsi du auzo elkarteak. Lantxabek azpimarratu du eskaera hauek guztiak Kalapie elkartearekin adostu dituztela eta baita zenbait udal ordezkarirekin ere.